Rom 6 | GAM | STEP | Na kandja djill al ge nono kandja namba we djimbon? Singare ke kaima yembona God nono wandill kerman golo aunda we djimbon mo?

Romans 6

Nono Jisas boll aike gopin

1 Na kandja djill al ge nono kandja namba we djimbon? Singare ke kaima yembona God nono wandill kerman golo aunda we djimbon mo? 2 Ge man, singare ke yepin ge kaima kere, una golo par mal embe mormon. Alla ipon ge, singare ke alla yembon mo? Ge man. 3 Ye asa Krais Jisas kandjiye al nu pai ge, une goi ge ye une boll aike goi. Ge ye nakaninj mo? 4 Nono nu papin ge, Krais goika una ipo gull toi mal embe, nono une boll gopinka, God wo nono i gull toi pora dji mal embe mormon. Alla nono Nane yembe ye Krais i gun wori mal embe, une nono para i wordaka wo er gun bon.

Jisas aglo er wo gun pi mal embe nono une boll aike gun mopon

5 Nono Jisas boll mormon ge, une goi mal embe ge nono aike gopin. Alla une aglo er wo gun pi mal embe, nono alla er wo gun bon. 6 Er wo gun bon ge nono kanmon, Krais iko pera al goi ge, nonekne nomane ke pai mopin ge, para aike une boll gopin. Singare ke nono gaklene al pai ge alla yembe nayenda, une nono boi mal embe kuika singare ke yepin ge alla nayembon. 7 Nayembon ge, nono una gor mal embe mopon. Singare ke pai ge nono boll yembe nayenda, boi kui nono er orko wopin pora dji.

8 Ba Krais goi al ge nono para aike gopin pille, une gun moro mal embe ge nono une boll aike kaima gun mopon dje pirmon. 9 Krais golo pa alla agi al ge nono kanmon, Krais alla nagoya; goi me ge yembe yei ba man pai. 10 Une kun taimane goi al ge, une djingjang me ge kamblo kal woro keri. Alla ipon une gun moro ge une God boll gun moro. 11 Gun moro mal embe, ye goi, singare ke me ge, yembe ye djinda, man, ye Krais Jisas boll aike mor pille, ye God boll gun mormon dje ye nomane embe panda moye.

12 Singare ke me ge ye makimb al gaklene kantau nayenda. Ye goye gaklene paro ge, kandja djinda mal, ye nayene. 13 Ye gaklene tambiye ta, ipo singare ke me ge naune. Singare ke me ye kantau yendaka ye po singare ke yene ge kune nayendo, man. God ye i gun wori, ye gaklene boll boll ipo God moro al awo kerne. Une ye gaklene kantau ye ipo wordaka, ye singare wopake yene. 14 Ye Mosis lo menameto namor; ye God wandill golo awi al ge menameto mor, singare ke me ge ye kantau nayenda.

Kaye papin pora dji, God pro mal yembon

15 Asa kandja lo dji mal nono menameto mopin ba ipon God nono wandill golo awi al menameto mormon. Ge pille kandja namba we djimbon? Nono po singare ke alla yembonka, God nono wandill golo aunda we djimbon mo? Ge man. 16 Pir mo? Ye yenekne ipo iwa ta moya al awo, yene kandja djinda mal yene ge, ye une boiye mal embe moye. Embe paro pille, ye kondwe soka yero. Ta ge, singare ke me ge ye kantau yendaka, ye singare ke ye po goye. Mo ta ge, ye God kandja djinda mal pille yene ge, ye wambo napanda, kiwa moye. 17 Asa singare ke me ge ye molo amblo gi djika, ye singare ke ye wani ba alla, ipon no God kandjiye bek awi ge, ye menameto molo, une kandja dji mal kaima yei. Yei ge na wopake we dje God aundo! 18 Asa singare ke me ge, ye kaye to wori moi ba, ipon God wo ye dje i orko wori pille singare wopake me ge ye kantau yenda.

19 Una kaye parka kiwa morka yenj we dje na kandja embe djindo ge, ye piye dje pille na kandja su ye djindo. Asa ye kakene aglene ne, ge ipo iwana djingjang ke yenj mal yei ge, singare ke me ge ye boiye pai. Ba ipon ye God kogoye taimane paro mal embe yembon dje pille yenj ge, ye singare wopake me ge boiye pane.

20 Asa, singare ke me ge ye kantau yei poke ge, ye singare du dje yembon dje napi. 21 Ipon ye ngandjill golo mor ba asa ye singare ke yei ge ye wal naral imbon dje yei? Ge man. Una singare ke embe yene ge goye. 22 Ba ye singare ke yei al kaye pai ge God dje i orko wori, ye God boiye mor. Yei al ge, ye God wombaye molo, une pro mal eri ye pa pineke, ulle al ge ye gun molo pa moye. 23 Ge una singare ke ye pa moi dal, top wopake ta naine, kaima goye. Ba nonekne Iwa Kerman Krais Jisas kogo yei al ge, God nono wal gorwulle ta aunda imbon. Ge nono gun molo pambon.